काठमाडौँ, असार ३ । देशभर बैंकिङ कसुरदेखि लिएर वैदेशिक रोजगारीका नाममा ठगीसम्मका घटनामा महिला तथा युवतीहरू संलग्न रहेको पाइएको छ। पछिल्लो केही दिनयता मात्रै प्रहरीले फरक–फरक ठगी अभियोगमा तीन जना महिला र युवतीलाई  पक्राउ गरी सम्बन्धित निकायमा बुझाएको छ।

बैंकिङ कसुरमा अस्मिता तामाङ पक्राउ

नुवाकोट जिल्ला, विदुर नगरपालिका–७ स्थायी घर भई हाल काठमाडौँ महानगरपालिका–१६ मा बसोबास गर्दै आएकी ३४ वर्षीया अस्मिता तामाङलाई  काठमाण्डौ उपत्यका अपराध अनुसन्धान कार्यालय, टेकु प्रहरीले रु. १ लाख ५ हजार बराबरको बैंकिङ कसुर मुद्दामा पक्राउ गरेको छ।

उनीविरुद्ध काठमाडौँ जिल्ला अदालतबाट २०७९ सालमा पक्राउ अनुमति जारी गरिएको थियो भने २०७९ चैत १ गतेको फैसलामा बैंकिङ कसुर पुष्टि भएपछि प्रहरीले खोजी जारी राखेको थियो। असार २ गते पक्राउ परेकी उनलाई प्रहरी वृत्त महाराजगञ्जमा बुझाइएको छ।

वैदेशिक रोजगारीको नाममा ठगी गर्ने दुई युवती पक्राउ

यसैबीच वैदेशिक रोजगारीको प्रलोभन देखाएर रकम ठगी गर्ने कार्यमा संलग्न दुई युवती पनि प्रहरी फन्दामा परेका छन्।
लिथुनिया र युके पठाइदिने भन्दै उनीहरूले लाखौँ रुपैयाँ असुल गरेको खुलेको छ।

रेशिका हमाल न्यौपाने
उमेर: २३ वर्ष

स्थायी ठेगाना: चागुनारायण नगरपालिका–१, भक्तपुर

गन्तव्य देशको नाममा ठगी: लिथुनिया

विगो रकम: रु. ६ लाख ८ हजार

पीडित संख्या: २ जना

सुजनी कुमारी साह
उमेर: २६ वर्ष

स्थायी ठेगाना: जनकपुर उपमहानगरपालिका–४, धनुषा

हाल बसोबास: काठमाडौँ महानगरपालिका–३२

गन्तव्य देशको नाममा ठगी: युकेको नाममा ठगिएको

विगो रकम: रु. १७ लाख ४ हजार

पीडित संख्या: १ जना

यी दुवै युवतीहरूलाई असार ३ गते काठमाडौँको वडा नं. ३२ बाट पक्राउ गरिएको हो। उनीहरूलाई वैदेशिक रोजगार विभाग, ताहाचलमा बुझाइएको प्रहरीले जनाएको छ।

महिलामार्फत ठगीको प्रवृत्तिमा वृद्धि

यस्ता घटनाले पछिल्लो समय महिला तथा युवतीहरू नै ठगीको योजनाकार वा सहयोगीको रूपमा संलग्न हुने प्रवृत्ति बढेको देखिएको प्रहरी स्रोत बताउँछ। वैदेशिक रोजगारी, लगानी, सहकारी, बैङ्किङ कारोबार जस्ता क्षेत्रहरूमा महिलाहरूले पनि सञ्जाल निर्माण गरेर विश्वास जित्ने तर पछि रकम लिएर सम्पर्कविहीन हुने प्रवृत्ति दोहोरिएको पाइएको छ।

प्रहरी प्रवक्ता एवं एसपी  काजी कुमार आचार्यका अनुसार, "महिला तथा युवतीहरूलाई भरोसा गर्ने प्रवृत्ति अपराधीहरूले नै प्रयोग गर्न थालेका छन्। उनीहरू प्रलोभन, फुसलाहट वा पारिवारिक चिनाजानीको भरमा ठगी गर्छन्।"

सजगता र सतर्कताको आग्रह

प्रहरीले यस्ता ठगीका घटनाबाट बच्न सबैलाई कुनै पनि विदेश पठाउने वा आर्थिक लेनदेन गर्ने सन्दर्भमा प्रमाणित तथा अनुमोदित संस्था वा व्यक्तिमार्फत मात्र प्रक्रिया अघि बढाउन अनुरोध गरेको छ।

अन्यथा, निजी सम्पर्क र प्रलोभनको भरमा हुने विश्वासले लाखौँको ठगी निम्त्याउन सक्छ, जसको पछुतो पछिसम्म पनि हुन सक्छ।