काठमाडौं, भदौ १४ – राष्ट्रिय जनसाहित्यिक सङ्घ, नेपालले आयोजना गरेको ‘अविरल जनसाहित्य यात्रा’को १०२ औँ विशेष शृङ्खला राष्ट्रिय जनसांस्कृतिक महासङ्घ, नेपालको सभाकक्ष, बागबजारमा शनिबार अपराह्न १ बजे सम्पन्न भयो। झापाका प्रगतिवादी स्रष्टा परशुराम पराशरले आफ्नो जीवनभरको सिर्जना र सामाजिक रूपान्तरणको चेतनासँगै एक दर्जन कविता प्रस्तुत गर्नुभयो।

युद्धप्रसाद मिश्र स्मृति प्रतिष्ठानका अध्यक्ष डा.फणीन्द्रराज निरौलाको प्रमुख आतिथ्यमा सम्पन्न समारोहको अध्यक्षता राष्ट्रिय जनसाहित्यिक सङ्घ नेपालकी अध्यक्ष नर्मदेश्वरी सत्यालले गर्नुभएको थियो भने सचिवालय सदस्य गोपालकुमार मैनालीले कार्यक्रम सञ्चालन गर्नुभयो।

समारोहमा महासङ्घका उपाध्यक्ष नमुना शर्मा, महासचिव आर.सी. न्यौपाने, प्रगतिशील लेखक सङ्घ नेपालका अध्यक्ष डा.देवी दुलाल क्षेत्री, अभिनव साहित्य समाजका अध्यक्ष गोविन्द घिमिरे ‘वेदमणि’, वरिष्ठ स्रष्टा उमेश उपाध्याय, महेशराज खरेल, शारदा पराजुली, विमल अर्याल लगायत थुप्रै साहित्यकर्मी र सामाजिक अभियन्ता उपस्थित थिए।

अध्यक्ष नर्मदेश्वरी सत्यालले कविनायक परशुराम पराशरलाई माल्यार्पण गरी स्वागत गर्नुभयो। सोमनाथ दाहालले कविको परिचय दिँदै उहाँको साहित्यिक यात्रा र सामाजिक रूपान्तरण अभियानमा सक्रियताबारे जानकारी गराउनुभयो। झापाको गौरादह नगरपालिका–७ जन्मिएका पराशरले सानै उमेरदेखि कविता सिर्जना गर्दै साहित्य क्षेत्रमा निरन्तर योगदान गर्दै आउनुभएको छ। उहाँका ‘परिचय’ (२०६६), ‘नवरत्न’ (२०६७) र ‘सावधान’ (२०८१) प्रकाशित कृतिहरूका साथै करिब आधा दर्जन प्रकाशोन्मुख कृतिहरू रहेका छन्।

पराशरले आफ्ना कवितामार्फत राजनीतिक, सामाजिक, प्रशासनिक क्षेत्रका विकृतिलाई उजागर गर्दै सामाजिक रूपान्तरणको संदेश प्रवाह गर्नुहुन्छ। कार्यक्रममा उहाँले उपजाति, मन्दाक्रान्ता, मालिनी, शार्दूलविक्रीडित छन्दमा लिखित आफ्ना कविता वाचन गर्नुभयो। साथै, कृष्णप्रसाद पौडेल जस्ताघरे, चेबन बस्नेत ठुलाघरे, डिल्लीप्रसाद मुल्तिउन, नारायण निरासी, विपी इलामे, मेनका आचार्य पोखरेल र शारदा पराजुलीले सहयोगी कविताहरू वाचन गर्नुभयो।

प्रधान अतिथि डा.फणीन्द्रराज निरौलाले कविताको समीक्षा गर्दै पराशरका कवितामा नेपाली समाजका यथार्थ, भ्रष्टाचार, असमानता, नेताको विकृत व्यवहार र सामाजिक रूपान्तरणको चाहना स्पष्ट देखिएको बताउनुभयो। उहाँले कवितामा सरल भाषामा गम्भीर भाव सम्प्रेषण, प्रतीक र अलङ्कारको सशक्त प्रयोग तथा प्राकृतिक, सांस्कृतिक र पौराणिक विम्बहरूको उपयोग गरिएको उल्लेख गर्नुभयो।

समारोहका उपाध्यक्ष रमेश पोखरेलले पनि कविको सिर्जना, साहित्यिक सङ्घसंस्थामा सक्रियता र सामाजिक रूपान्तरण अभियानमा योगदानको सराहना गर्दै आगामी ‘अविरल जनसाहित्य यात्रा’ १०३ औँ शृङ्खलामा भवानी खतिवडालाई प्रस्तुत गर्ने जानकारी दिनुभयो।