काठमाडौं, जेठ ३१ — कुशल युवा गीतकार कुमार बोम्जनको शब्दमा रचित नयाँ गीत "सिर सिर हावा" को म्युजिक भिडियो २०८२ जेठ ३० गते शुक्रबार सार्वजनिक गरिएको छ। गायक राजु लामा (मंगोलियन हार्ट) र मेलिना राईको आवाजमा सजिएको यस गीतमा प्रेमको गहिरो अनुभूति, आत्मीयता र समर्पण अभिव्यक्त गरिएको छ।

गीतमा संगीत शुभ तामाङको रहेको छ, जसले गीतलाई अझ सुमधुर र भावनात्मक बनाएको छ। भिडियोलाई कुमार बोम्जनको आफ्नै युट्युब च्यानल Kumarbmzn बाट सार्वजनिक गरिएको हो।

प्रेमको कथा, भावनाको प्रस्तुति
गीतका हरफहरूमा सच्चा प्रेम, समर्पण र भावनाको गहिरो अभिव्यक्ति छ।

“यत्ति प्यारो साथ छ त्यो ज्यानको
तिमी नै हौ मायालु यो मनको,
जबसम्म ढुकढुकी रहिरहन्छ
तिम्रै लागी हर व्यथा सहिरहन्छ…”

यी पंक्तिहरूमा गीतकारले जीवनसाथीप्रतिको निष्ठा र आत्मसमर्पणलाई कलात्मक रुपमा प्रस्तुत गरेका छन्। विशेष गरी “जबसम्म ढुकढुकी रहिरहन्छ...” भन्ने पंक्तिले प्रेमको अमरताको अनुभूति गराउँछ।

भिडियो: अभिनय र दृश्य सौन्दर्यको सफल संयोजन

भिडियोमा आकाश श्रेष्ठ र नव मोडल कृष्टि शेरबुजाको दमदार अभिनय देख्न सकिन्छ। उनीहरूको केमिस्ट्री स्वाभाविक र भावनात्मक छ। निर्देशक मौसम हिमालीले भिडियोको संरचना कलात्मक ढंगले निर्माण गरेका छन् । छायाङ्कनमा बुद्ध थापा र उनको समूहले उत्कृष्ट काम गरेका छन् भने सम्पादन नवीन घर्ति मगरको रहेको छ।

सिनेम्याट्रोग्राफी, लोकेशन छनोट, लाइटिङ र सम्पादनका पक्षमा भिडियो निकै सबल देखिन्छ। संवादविहीन तर भाव–व्यञ्जनायुक्त अभिनयले गीतको कथालाई जीवन्त बनाएको छ।

सांगीतिक पहिचान र आत्म–अभिव्यक्ति

गीतकार कुमार बोम्जन नेपाली र तामाङ सेलो विधामा सशक्त पहिचान बनाउँदै आएका छन्। उनका गीतहरूमा प्रेम, पीडा, समर्पण र सांस्कृतिक चेतनाका सूक्ष्म भावहरू देखिन्छन्। “सिर सिर हावा” गीतमार्फत उनले पुनः एकपटक आत्मिक प्रेमलाई संगीतमार्फत उजागर गरेका छन्।

समग्र मूल्यांकन

"सिर सिर हावा" एउटा गीत मात्र होइन, यो सांगीतिक कथा हो-जहाँ शब्द, संगीत, स्वर र दृश्यले मिलेर एक समग्र प्रेमभाव बोकेको कलात्मक सन्देश दर्शकसमक्ष प्रस्तुत गर्छ। गीतकारको गहिरो भाव, गायकद्वयको प्रभावशाली स्वर, निर्देशकको दृष्टिकोण र कलाकारहरूको अभिनय-यी सबै तत्व मिलेर यो म्युजिक भिडियोलाई भावनात्मक र दृश्यात्मक उत्कृष्टताको समिश्रण बनाएकाे छ। सफलता र उन्नतिका लागि साँघु परिवारकाे हार्दिक शुभ कामना ।