रुपन्देही, भाद्र १३ – जिल्लाका विभिन्न स्थानमा चेकजाँचका क्रममा प्रहरीले भन्सार छली गरी ल्याइएका करिब ५ लाख ८३ हजार रुपैयाँ बराबरका विभिन्न अबैध सामान बरामद गरेको छ । जिल्ला प्रहरी कार्यालय रुपन्देही र मातहतका विभिन्न इकाईबाट खटिएको प्रहरी टोलीले २०८२ भदाै १३ गते शुक्रबारदेखि शनिबार रातिसम्म सञ्चालन गरिएको विशेष चेकजाँच अभियानमा उक्त सामान नियन्त्रणमा लिएको हो ।

बरामद गरिएका सामानहरूलाई आवश्यक कारवाहीका लागि भन्सार कार्यालय बेलहिया तथा पशु क्वारेन्टाइन कार्यालय बेलहिया रुपन्देहीमा बुझाइएको प्रहरीले जनाएको छ ।

भैंसी–पाडासहित दुई पक्राउ

इलाका प्रहरी कार्यालय मझगवाबाट खटिएको टोलीले रुपन्देहीको कोटहिमाई गाउँपालिका–५ मझगवास्थित सडक खण्डमा चेकजाँच गर्ने क्रममा लु १ च ७८६३ नम्बरको छोटा हात्ती गाडीमा २ भैसी र १ पाडी लोड गरी ल्याइएको फेला पारेको छ । उक्त पशुको मूल्य करिब ४ लाख ५० हजार रुपैयाँ बराबर हुने अनुमान गरिएको छ । सो गाडीका चालक सियारी गाउँपालिका–४ छपियाका २५ वर्षीय जगदिश यादव र सोही स्थानका ४५ वर्षीय रामविलास यादवलाई प्रहरीले नियन्त्रणमा लिएर भन्सार कार्यालय बेलहियामा बुझाएको छ ।

कपडा, विद्युतीय उपकरण र किराना सामान बरामद

त्यस्तै, इलाका प्रहरी कार्यालय बेलहियाबाट खटिएको टोलीले सिद्धार्थनगर नगरपालिका–१ बेलहिया बाइपासमा चेकजाँच गर्ने क्रममा १७ थान सुट, १ थान रोटरी ह्यामर, १ थान ब्लेन्डर, १ बोरा किराना सामग्री र २ बोरा सुर्तीजन्य सामान बरामद गरेको छ । यी सामानको अनुमानित मूल्य १ लाख २ हजार रुपैयाँ बराबर हुने बताइएको छ ।

दाल–मटर

प्रहरी कार्यालय मंगलापुरबाट खटिएको टोलीले तिलोत्तमा नगरपालिका–९ मंगलापुरस्थित बाटोमा चेकजाँच गर्दा ५० केजी मटर र ५० केजी अरहर दाल बरामद गरेको छ । बरामद दाल–मटरको मूल्य करिब १५ हजार रुपैयाँ बराबर हुन्छ ।

बोइलर कुखुरा

यस्तै, प्रहरी चौकी पिप्रहवाबाट खटिएको टोलीले रोहिणी गाउँपालिका–५ चम्किपुरबाट ल्याइँदै गरेको ४० वटा बोइलर कुखुरा बरामद गरेको छ । बरामद कुखुराको मूल्य करिब १६ हजार रुपैयाँ बराबर हुने बताइएको छ ।

कारबाहीका लागि भन्सार पठाइयो

प्रहरीले बरामद गरिएका सबै सामानलाई आवश्यक कारबाहीका लागि भन्सार कार्यालय बेलहिया र पशु क्वारेन्टाइन कार्यालय बेलहियामा बुझाइसकेको जनाएको छ । जिल्ला प्रहरी कार्यालय रुपन्देहीले यस प्रकारको अवैध पैठारीविरुद्ध नियमित चेकजाँचलाई अझ कडा बनाइने चेतावनी दिएको छ ।