असार ७ गते । बाँके जिल्लाको नरैनापुर गाउँपालिका–२ स्थित लक्ष्मणपुर स्वास्थ्य चौकीमा नेपाली सेना अन्तर्गत बज्रदल गण, नेपालगञ्ज र सैनिक अस्पताल, नेपालगञ्जको संयुक्त पहलमा विशेषज्ञ चिकित्सकसहितको निःशुल्क स्वास्थ्य शिविर सम्पन्न भएको छ ।

 असार ७ गते  शुक्रबार सम्पन्न उक्त स्वास्थ्य शिविरमा करिब ७ सय स्थानीय बासिन्दाले विभिन्न प्रकारका निःशुल्क स्वास्थ्य सेवा प्राप्त गरेका छन् । शिविरमा सर्वसाधारण, महिला, बालबालिका तथा जेष्ठ नागरिकहरूले नियमित स्वास्थ्य परीक्षण, परामर्श, औषधि वितरणलगायतका सेवा लिएका थिए ।

स्वास्थ्य शिविरमा नेपाली सेनाको टोलीसँगै सैनिक अस्पताल नेपालगञ्जबाट आएका छाला रोग, नाक-कान-घाँटी (ईएनटी), स्त्री तथा प्रसूति, हाडजोर्नी, बाल रोग, दन्त तथा जनरल फिजिसियनसहितका अनुभवी विशेषज्ञ चिकित्सकहरू खटिएका थिए । सेनाले सञ्चालन गरेको शिविरमा स्थानीय स्वास्थ्य संस्थाहरू, लक्ष्मणपुर स्वास्थ्य चौकी र नरैनापुर गाउँपालिकाको समन्वय पनि उल्लेखनीय देखिएको थियो ।

बज्रदल गण, नेपालगञ्जका गणपतिका अनुसार नेपाली सेनाले समाजप्रति उत्तरदायी भूमिकाअन्तर्गत ‘राष्ट्रको सुरक्षासँगै सेवामा’ भन्ने भावनालाई आत्मसात गर्दै ग्रामीण तथा सीमान्तकृत क्षेत्रमा पुगेर निःशुल्क स्वास्थ्य सेवा उपलब्ध गराउने कार्यक्रमलाई निरन्तरता दिँदै आएको छ ।

“सुरक्षाकर्मी मात्रै नभई समाजसेवामा पनि नेपाली सेना अगाडि रहेको देखाउन यस किसिमका शिविरहरू प्रभावकारी माध्यम हुन्,” गणापतिले भने, “हामीले लक्ष्मणपुर जस्तो सीमावर्ती क्षेत्रका बासिन्दाका लागि यो शिविर आयोजना गर्दा पाएको साथ र सकारात्मक प्रतिक्रिया अत्यन्त उत्साहजनक छ ।”

स्वास्थ्य सेवा लिनेहरूमध्ये धेरैजसो महिलाहरू रहेका थिए, जसले स्त्रीरोग, प्रसूति सम्बन्धी समस्या, रगतचाप, मधुमेहजस्ता दीर्घरोगको परीक्षण तथा परामर्श लिएका थिए । साथै बालबालिकाको खोप अवस्था, पोषण परीक्षण र सामान्य चेकजाँचमा पनि ठूलो सहभागिता देखिएको थियो ।

स्थानीय वडाध्यक्ष र शिविरमा संलग्न स्वास्थ्यकर्मीहरूका अनुसार यस किसिमका कार्यक्रमले ग्रामीण बासिन्दामा स्वास्थ्यप्रति जागरूकता मात्र बढाउँदैन, नियमित जाँच र उपचारका लागि प्रेरित पनि गर्छ ।

नेपाली सेनाले स्वास्थ्य शिविरमार्फत निःशुल्क औषधि वितरणसमेत गरेको थियो । शिविरमा सहभागी चिकित्सकहरूले रोगको पहिचानसँगै उचित खानपान, सरसफाइ, पोषण र नियमित स्वास्थ्य जाँच सम्बन्धी जनचेतनामूलक सन्देशसमेत दिएका थिए ।

यसअघि पनि नेपाली सेनाले देशका विभिन्न दुर्गम तथा सीमान्तकृत क्षेत्रमा यस्ता निःशुल्क स्वास्थ्य शिविर सञ्चालन गर्दै आएको छ । सेनाको यस्तो प्रयासले जनताको स्वास्थ्य पहुँच अभिवृद्धिमा सहयोग पुगेको स्थानीयले प्रतिक्रिया दिएका छन् ।