काठमाडौँ, १६ भदौ : नेपाली सेनाले अविरल वर्षाका कारण कञ्चनपुरको दोधारा चाँदनी नगरपालिकास्थित जोगबुढा नदीमा आएको बाढीले डुबानमा परेका २५ जनाको सकुशल उद्धार गरेको छ ।
बाढीले नदीको तटबन्धलाई पार गरी जग्र्गा टोल र ट्यापु गाउँमा पस्दा डुबानमा फसेका नौ पुरुष, ११ महिला र पाँच बालबालिकालाई उद्धार गरी सुरक्षित स्थानमा स्थानान्तरण गरिएको सैनिक जनसम्पर्क तथा सूचना निर्देशनालयले जनाएको छ ।
कञ्चनपुरस्थित रणसिंह दल गणबाट खटिएको टोलीले रबर बोट तथा विपद्का अन्य सामग्री प्रयोग गरी उद्धार गरेको सेनाले जनाएको छ ।
यस्तै, सेनाले नुवाकोटको शिवपुरी गाउँपालिका–४ स्थित पिङ्क हाइट इलाकामा हाइकिङ जाने क्रममा बाटो बिराएर हराएका १४ जनाको सकुशल उद्धार गरेको छ । उनीहरूलाई यही आइतबार राति उद्धार गरिएको हो ।
---
प्रतिकृया दिनुहोस